當年今日
關於我們

【洗米華知唔知㗎…】洗米仔俾埋私人手機號碼用家 求對方致電

蘋果日報 2017/06/16 11:30

周柏豪出事洗米仔serverOction

【新增回應】
洗米仔周柏豪個拍賣app「Oction」,15號(噚日)開始運作,點知因為太多人玩,個server承受唔到,冧咗……即係,啲客本來諗住用幾個credit(每個Credit價錢為0.8元至4蚊)bid部電話返嚟,點知一出手個app就勁lag。
有用家嬲爆留言:「但一場比一場lag,lag到我以為個app中毒,你叫我哋點落bid,邊有人仲敢買Credits?」、「究竟你哋個app有冇做過測試先俾人玩?」
用家心情,當然明。老闆洗米仔自然亦要急急補飛,香港時間凌晨4點幾喺個app嘅官方fb post兩條片,一中一英,各長逾5分鐘。片中洗米仔不斷耍冧道歉,「我哋冇預計到大家反應原來係咁踴躍,我冇預計到原來同一時間係有幾千人bid部iPhone,咁但係呢個唔係大家嘅問題,而係我嘅疏忽。我大意,我希望大家可以原諒我。」
洗米仔喺片中承諾,以後每次拍賣,都會喺佢哋個官方fb開post,用家留言佢哋會即follow,又承諾若因server問題致客戶有損失,經查證後credit會全數退回。
睇番佢哋個官方fb,的確唔少網民留言狂轟,而且留言相當有畫面,例如呢句:「Switch時hang咗,落唔到bid就突然完咗…」、「6點正,bid 唔到,貨唔見埋」、「Delay到一下都落唔到就完,唔使玩」、「一玩即死機,想睇下有咩拍賣,又死機。」但都有唔少人留言讚(你懂的),亦有用家稱個app問題雖然超多,但cs回應有效率。
又的確,官方fb嘅編輯(即係大家所講嘅「小編」)好勤力逐個覆,逐個留言耍冧,洗米仔都用自己私人fb acc.回覆致歉。但最估唔到係……
洗米仔竟然留自己mobile號碼俾用家,仲話:"I'm really sorry.Is it okay for me to speak to you shortly on the phone to apologise?"
唔使吓嘛…
而《蘋果》今日揾過洗米仔,佢話:「我噚日直頭覺得慚愧,因為估唔到同一時間咁多人做同一樣嘢,我哋已經開咗好多server。」問佢點解唔考慮再測試先重新推出app?洗米仔就話呢個方法唔可行:「我哋其實之前試過好多次,但好多嘢係要做咗先至知,但好開心香港人好好,佢哋不停咁cap圖話俾我哋知有乜問題,咁樣令我哋加快速度處理問題。」
洗米華呢個app噚日上架,佢話呢兩日忙到38個鐘冇瞓過,而今日個app已經解決咗99%問題, 但如果仍有用戶因為app問題受影響,佢哋會將買咗嘅credit全部退回。