當年今日
關於我們

中國長城裂縫加深
世盃求驗客:巴西大炒盤口熱爆燈

蘋果日報 2002/06/06 00:00


中國喺世界盃決賽周歷來第一仗,雖然輸咗畀哥斯達黎加○比二,不過表現都算唔錯;可惜范志毅喺嗰場波受傷,重話可能係左膝韌帶撕裂,未必踢到餘下嘅比賽。另外,孫繼海亦傷得唔輕;如果呢個消息屬實嘅話,中國下一場對巴西嘅分組賽就危矣。
據我求大俠所知,嗰啲境外博彩公司𠵱家已經開到巴西讓中國兩球半,而巴西贏五比○嘅賠率,亦只係得嗰八倍,真係熱到嘔。咁如果中國後防主力嘅范志毅同埋孫繼海,真係唔出得嘅話,巴西要讓幾多好呢?後果真係不堪設想喇!
韋夫要服從多數改名胡禮
講起中哥場波,替哥國入第二球嘅胡禮(Wright),其實叫韋夫,佢件波衫都印住Wrigth。對於擺咗烏龍叫佢做胡禮,國際足協竟然話係因為韋夫效力嘅球隊叫佢做胡禮,又話上網摷過有二千嘅個sources叫佢做胡禮,得八個叫佢做韋夫,所以少數服從多數喎!

國內傳媒「作」雲祖柏食禁藥
講開又講,中國輸咗俾哥斯達黎加之後,竟然有國內傳媒話哥國前鋒雲祖柏被驗出食咗禁藥,搞到哥國由贏二比○,變咗輸○比二俾中國。我求大俠聽到之後,真係唔知好嬲定好笑,事關國內啲傳媒咁做,會俾其他國家嘅人覺得我哋中國人輸唔起。輸波唔緊要,千祈咪輸埋風度。

安貞煥老婆禁食祈禱用心良苦
南韓靚仔球星安貞煥嘅老婆、前南韓小姐李惠媛認真唔話得,為令國家隊可以晉身決賽周十六強,喺揭幕戰開始已禁食祈禱,喺前日當南韓贏咗波之後,佢重話要禁食祈禱至南韓入到八強。雖然李惠媛係用心良苦,但咁禁食法,容乜易搞出人命?

稻本潤一要脅難得米
前日喺對比利時時射入一球靚波嘅日本中場稻本潤一,唔知係咪開心得滯,竟然話如果下季喺阿仙奴冇正選打,就會離隊。係人都知「兵工廠」條中場線計落有韋拉、皮利斯同龍格保等,連踢都未有份踢嘅稻本咁就話想打正選,會唔會大想頭咗啲呢?