作為國有企業的上司，國務院國資委主任李榮融一向視國企為「共和國長子」，佢近日仲好肉緊咁話，希望將央企打造成美國NBA籃球巨星米高佐敦一樣，喺有需要時要撐得起場面。
相信李主任係忠實籃球迷，前日喺廣州出席一個國企專題報告會時發言，就用咗籃球賽做比喻。
佢話國企喺國家經濟中要繼續扮演主導角色，而國家經濟就同籃球比賽一樣，一定要有巨星，否則好難攞到總冠軍，「美國NBA製造精采，其成功之處，在於有劇情有懸念，那怕前三節落後20分，第四節也能反敗為勝，而製造劇情的，正是場上的球星。」而所謂巨星，就係能夠承擔責任；就好似最後一球，一定會傳畀巨星佐敦，因為佢一定能夠投入三分波。
李主任深明將央企塑造成為巨星，一定要有良好制度，要政企分家；佢話，過去有個省嘅交通廳長職位接連3個倒下，就係因為制度問題，廳長上任時並唔係壞人，但咁大權力集中喺佢身上，人哋成日攞住銀紙圍住佢轉，佢唔腐敗都幾難。