港股果然以大裂口突破形態、及830多億元的大成交，以雷霆萬鈞之勢，成功衝破250日線（17207）阻力，高收17544，大升521點，期指升多104點，低水收窄到唔夠70點。
大市氣勢如虹，上升正股超過740隻，升幅超過20%嘅都有22隻，好友仍有大把在手。今次大市突破歷時近半年的長方形徘徊區頂部，並完成後抽整固，升勢再起，上升目標指向19600至20220點。
今日推介五礦資源（1208），兩大理由睇好。第一，去年經歷行業低潮，今年盈利可大幅回升；第二，母公司有大動作，注資又有新概念。
先講母公司嗰筆。五礦集團已獲澳洲政府批准向OZMinerals提出以12.06億美元收購多個資源項目，並成立新公司，由現任CEOMichelmore率領當地管理團隊營運，OZMinerals將於下月11日舉行股東大會表決。
五礦收購行動似曾相識。早幾日，本欄推介嘅智富能源（1051），亦係收購OZMinerals一個在印尼的金銀礦，同樣聘任OZ創辦人之一Hegarty在新公司「打骰」。智富收購消息宣佈後，股價在幾日內大幅飆升一倍。
五礦資源市值約40億元，係五礦集團在海外上市旗艦，主要從事氧化鋁及鋁錠貿易，以及生產鋁製品等。母公司多年來一直默默扶持五礦資源，今次收購澳洲第3大上市公司礦產，好明顯係為日後注資而鋪路，令五礦資源快高長大，成為亞太區的礦業龍頭。由於「晒士」太大（成百億元），相信會分批注入，對股價不斷會有刺激。

預測PE僅5.2倍

至於08年（12月年結）盤數，營業額84.5億元，升15%，股東應佔溢利只得1250萬元，大減99%。不過，去年令業績大幅倒退嘅不利因素，包括高油價令運輸成本大增、原鋁及氧化鋁價格急跌，以及為存貨及採購權作出減值等，今年都已有明顯改善，其中油價已大幅回落，而鋁價亦已由低位回升，估計09年盈利可重上07年的8億元水平，每股盈利0.38元，預測PE只5.2倍。
五礦資源昨收1.97元，升9.4%，成交2600多萬股，比前日大增近3倍，升破上升旗形及前高位阻力，短線可上衝2.50元，中線可以每股NAV2.96元為目標，坐二望三。
郭兆誠