黃翠如今日喺中環出席「PANDORA2016年春季系列發佈會」，翠如獲配戴春季新款首飾。PANDORA喎，港女至愛啦！

咁蕭正楠（Edwin）有冇送飾物俾佢？翠如話：「有，有時佢喺飛機見到都會買，我有個盒仔專裝起佢送嘅飾物。」對禮物有咩要求？佢笑笑口話：「係佢送就得，但有啲似唔係佢揀就唔得，其實佢揀嘅都好簡單，品味都唔差，我真係會戴到，佢仲鍾意揀花形狀飾物。」

「我哋唔希望送太貴，唔好縱壞大家，其實價值唔重要，我鍾意將佢送嘅飾物戴喺身，但佢從來都唔戴，佢話唔鍾意有嘢箍住，覺得唔舒服。」翠如仲講笑咁話，想送戒指俾Edwin、曹永廉、陳國邦同黎耀祥，佢話：「因為佢哋四姊妹最近好close，送戒指俾佢哋結義金蘭。」至於3月14日白色情人節快到，翠如表示要同Edwin一齊開工過。