張繼聰噚晚喺紅磡出席新車發會，阿聰話以前買車首選要有型，o依家要裏面舒適：「證明人生另一個階段，我因為家庭成員多，所以屋企有三部車，其實都好享受揸車過程，因為我住得遠，車程耐，一個人揸車時可以好好沉澱同反思吓。」

阿聰仲自己揸車有啲規矩，佢話：「如果一家人嘅話，就可以好好傾偈，我有個規矩，坐車嘅時候唔畀玩電話。如果我唔使開工，就成日都會車太太，我就係司機，以前去旅行自駕遊都係我揸車，佢哋就好開心，但我要揸車，所以精神不振，後來去旅行都少咗揸車。」

講番上次老婆謝安琪整花架車件事：「大家都知佢上次整花咗條軨，但我要幫佢講番句公道說話，佢換咗四條軨都只係用咗一千幾百，但我之前撞甩咗個輪拱，整咗一大筆錢，所以相比起嚟，佢個傷亡程度係好小事。」張繼聰下個月生日，佢話要開工，預計一家人提早食飯慶祝，聖誕節就會留港：「因為係我細女出世後第一個聖誕，想帶佢睇吓聖誕燈飾同食聖誕大餐感受吓。」

另同場嘅黃心美就話自己有車牌，但係冇人肯借架車畀佢，連男友都唔肯，本身有車位但係冇車，等緊黃心穎搬出去，因為佢霸住個車位。有傳黃心穎同馬國明分手，心美話：「幾時傳㗎？成日都傳。我好少見心穎，佢忙拍劇，講都係講工作多。」咁最近有冇見佢眼腫腫？佢話：「冇，尋日拍完幾場喊戲都冇眼腫，唔知係咪滴眼藥水。」

更多娛聞，喺晒《娛果》
http://fb.com/appledailyent