17直播無皇管
官恩娜莊端兒曾遭性騷擾

蘋果日報 2017/02/21 00:00


隨住科技發達,人人都有部智能電話,唔單止人人可以做記者「爆相爆片」;直頭人人都可以做明星,令大家嘅眼球都聚焦喺自己身上。點解?因為人人都可以直播,逼(或者引)其他人睇自己表演。

講起直播,不能不提「17」呢個app。「17」喺2015年登陸兩大手機平台,期間試過「被下架」,因為有用戶利用「17」直播球賽、播咸片、或者當佢祼聊咁用。雖然「17」創辦人黃立成接受訪問時,堅稱個app有監控軟體,但係不正當使用行為都係「野火燒不盡」。

雖然「17」面對眾多批評,不過都有好多藝人用。無他嘅,人人都八卦,睇偶像直播就好似窺探緊對方嘅生活咁,邊個唔鍾意喎。

不過,有藝人用「17」嗰陣受到網民不禮貌嘅對待。好似官恩娜(Ella)咁,有網民留言「我想睇你乳頭」去性騷擾Ella,好彩Ella一句K.O.咗佢:「你自己有都兩個啦,使乜睇我,我唔會俾你嚇親。」o靚模莊端兒都同樣受過網民性騷擾,有人問佢「大波嗎」,而莊端兒嘅對付方法就係當睇唔到。另外,艾美琦仲試過直播期間疑似露暈。

總之網上世界千奇百趣,大家無論開直播定睇直播都好,小心為上,免得蝕底畀人又o徙數據啦。