現年34歲嘅宋慧喬再次憑人氣劇《太陽的後裔》爆紅，呢位女神除咗樣貌20年唔變外，佢平日亦都唔介意將最真實嘅一面盡現觀眾眼前，好似佢平日自拍就最愛素顏上陣，唔怕大家睇到佢臉上有幾多缺點，認真勇氣可嘉。

而噚日喬妹仲同《太陽》男主角宋仲基嚟咗香港，今日現身中環四季酒店為ViuTV開台造勢，噚日喬妹抵港時簡單着住一條黑白格仔連身裙，腳上踏上短boot，只孭住一個布袋，造型十分簡潔。不過原來喬妹唔單止有靚樣，佢仲係慳妹一名，事關佢噚日抵港時着住嗰件黑白格仔裙原來佢5年前已經着過，話說喬妹喺2012年時就通過fanspage上載一張相，佢話當時喺巴黎拍攝，只見當時不足30歲嘅喬妹着住同一件衫及裙，之後回眸一笑，個樣真係又純又可愛。