上個禮拜華華提過浸會大學工商管理學院4名學生，喺美國奪得由CFA協會主辦嘅全球投資分析比賽總冠軍。噚日4位凱旋而歸嘅年輕人，喺浸大同傳媒分享參賽感受。
4位年輕人都係三年級生，分別係嚟自會計及法律系嘅張文蔚、財務及決策學系周文泰同李麗兒，仲有市場學系嘅袁麗鈴。原來今次比賽唔少嚟自歐美大學嘅代表都係出身MBA，至於4位浸大代表只係讀緊BBA，雖然上到台對住班專業評判，點都有少少怯，但勝在年輕冇有怕。

睇好再生能源股

4位後生仔抽中分析中移動（941）呢隻股抵唔抵買，不過，原來只得周文泰有投資股票經驗，其餘3位女同學都冇掂過。不過，佢哋同華華講，分析中移動EBITDA（扣除利息、稅、折舊及攤銷前盈利）應該見136.6蚊，上個禮拜中移動收報129.1蚊，即係仲有七個半水位。
個市咁波動，華華考慮跟唔跟，但佢哋已經落手買。唔講唔知，周文泰係浸大嘅投資學會主席，呢個學會由班浸大舊生集資咗成百萬投資，周文泰幫學會3月尾喺中移動119.8蚊時入咗一手，4月尾股價升到135.5蚊時沽出，1個月賺7850銀。
既然周文泰炒股有一手，華華梗唔放過機會，佢話油價高企，美元下跌，有利再生能源行業，但究竟買邊隻，佢唔肯講。嗱，呢吓佢就要學吓香港股神，將股神名單公諸同好嘛！
電郵：mailto:[email protected]