上月旺角band房發生火警，歌手安俊豪勇救女鼓手被網友力讚，佢09年參加《亞洲星光大道》出道，攞過《亞洲星光大道星級舞鬥》冠軍，等到去年先有機會簽約做歌手。捱咗咁多年嘅安俊豪去年12月到韓國參加《Produce 101》選舉，可惜因為韓文唔掂衰咗，最近節目出街，只得一秒出鏡！

安俊豪接受《蘋果》電話訪問表示：「好多朋友都有send番畀我睇，特別係小師妹Monnie（「牛雜妹」李美琪）啦，佢send咗條片畀我，不過得一秒，幾尷尬！條片睇到我同另一個參賽者一齊入監製房，其實嗰時係去年12月，好開心可以有機會參加《Produce 101》。」

作為樂壇新人嘅安俊豪坦言，當初聽到消息可以參加，完全唔識韓文嘅佢，膽粗粗接受挑戰：「喺兩個月裏面學識基本溝通，甚至乎兩日學識一隻舞，一個禮拜要學識自我介紹，4、5日學識一首韓文歌，其實嗰陣時花咗好大努力去做呢件事，原來自己都學到一啲嘢，但可惜始終係一個真人騷，監製覺得我唱歌跳舞係過到關，但我嘅韓文要達到90-100%先可以表達真人騷，最後因韓文問題冇緣參加節目，但我喺呢次經驗學到好多嘢，起碼識少少韓文。」