日前一位抱住1歲BB的媽媽，喺上環登上一架968號線嘅九巴去元朗，但係當時架九巴已經坐滿晒乘客，未有人讓座。當時九巴車長歐成彪見到咁嘅情況，擔心嗰位抱B媽媽喺行車途中會跌倒，加上BB喊緊，佢就喺安全而且無影響其他車輛嘅情況下停車，離開司機位，行埋去關愛座度，向4位乘客講「見唔見到個太太抱住小朋友，關愛坐係比佢哋有需要人士坐，唔該讓座！」

事後，有乘客喺網上分享讓座事件，仲激讚九巴車長「司機叔叔你好型，希望每個司機都咁型」；網民見到都好Like，紛紛留言力撐「如果每個人有一份關愛心，香港明天會更好！」

有網民仲親身走去站頭搵嗰位盡責車長歐成彪，歐車長就話佢已經加入咗九巴6年，間中遇到推住BB車嘅家長上車，亦會主動幫手擺放好BB車；歐又話「其實做多少少嘢，個客又開心，自己又可以順順利利咁開車，何樂而不為？」

蘋果繼續撐【好人好事】，留意蘋果即時喇！