戀人要並肩走過25年當然唔容易，對於高爾夫球手同球僮嚟講，四分一世紀嘅感情一樣令人難捨難離。5屆大滿貫得主、47歲嘅美國高球手米高遜（Phil Mickelson）周二宣佈，同合作接近25年球僮、綽號係「Bones」嘅占麥基（Jim Mackay）分道揚鑣，呢位上周因為同女兒畢業典禮撞期而棄戰美國公開賽嘅球手表示：「我哋嘅決定並非一朝一夕，而係彼此感覺係時候作出改變。Bones係世上知識最豐富同投入嘅球僮之一，下一位同佢合作嘅球員肯定相當幸運。我哋嘅關係超越高球，佢自最初相識就係我生命中最重要同特別嘅人之一，我永遠會為佢所做嘅事而感恩。」

兩人自1992年開始並肩作戰580場賽事，喺高球場上共同行過25,450英哩，足夠環繞地球一周，米高遜亦喺Bones幫助下擊出超過13萬桿，取得7,329隻「小鳥」同210隻「老鷹」。占麥基亦發表聲明：「當我1992年獲米高遜聘用時有一個夢想，就係成為萊德盃球僮。直到舊年，米高遜已經連續11次出戰萊德盃，我亦好高興可以坐喺前排。」