【新增影片】

臨近年尾，財金界頻頻出現「炒風」，但唔係炒股個炒，而係炒人個炒，渣打、星展、瑞信相繼炒人，就連成日話招兵買馬嘅本地券商耀才(1428)都要炒人，旗下財經台三位女主播慘食「無情雞」。

每年農曆新年，耀才主席葉茂林都拖住半打靚女主播現身，請客戶睇戲兼派利是，前年仲話要將耀才財經台上市㖭。點知家陣上市冇影，仲要炒人。上星期炒走3位女主播，唔見一半人。

華華問過耀才行政總裁許繹彬（Edmond），佢強調，並非公司唔掂要炒人，而係主播試用期表現唔好先炒（3個都唔好？），但問到會否請番3名女主播，佢就話唔會，指台長要整理節目，因應觀眾要求，減少講股環節，加入其他消閒資訊。佢堅持話，公司一直請緊人，仲物色緊分店鋪位㗎。

而事實上，並唔係3位主播都過唔到試用期，好似其中一位曾小如(Kay)，喺耀才做咗一年有多。浸大傳理系畢業嘅Kay，做耀才之前做過Now TV體育主持，好彩今次慘食「無情雞」後，好快返番Now TV做體育主持。

之但係，耀才炒淨兩三名女主播，明年葉老闆出嚟派利是咪冇咁威囉！Edmond就話唔使擔心，指公司有唔少靚女同事喎。