主教山配水庫︱軍裝警駐守查問上山市民 多名遊人推倒鐵絲網闖入圍封範圍
主教山主教山配水庫蓄水池
今早有警員及警車在深水埗主教山現場駐守,現場看到「古羅馬式」蓄水池部份紅磚砌成的拱門和石柱已遭工程破壞。
有逾百年歷史的「古羅馬式」蓄水池,部份紅磚砌成的拱門和石柱已遭工程破壞,碎片遺留在內。蓄水池內仍留有水位刻度和大水管,雖然看似已生鏽,但目測結構仍完整。
《蘋果》今再到主教山視察,巴域街山腳今早6時已有兩名軍裝警員及一架警車駐守,向每名上山的市民查問來意。有警員指,今日市民可以上山,但「溫馨提示」不可進入已圍封的配水庫的範圍。下午不少市民登上主教山,希望一睹古蹟風貌,其間有數名青年推倒鐵絲網,闖入工地先睹為快。
旅遊攝影師李先生今早特意到主教山,從鐵絲網外面觀察遺蹟,對未能入內參觀感可惜,「香港好少有咁舊嘅遺蹟,同埋政府想拆咗佢,靠民間力量先停工」。他說,工人稱稍後會將遺蹟圍封,「佢哋都幾慘。佢哋原本嘅計劃係諗住回填咗佢,但而家係要封咗佢,工人都唔知開唔開到工。本身(工程)好小兒科,而家就搞到咁」。
李先生指,香港有這樣的建築,對他來說不算很震撼,因香港有不少有趣的地方,「反而覺得香港有更多地方未被人搵到,可能一直埋喺土地底」。他稱,曾到過的伊斯坦堡也有類似蓄水池,「冇諗過香港都有咁嘅地方,香港真係好有歷史,所以先有咁神奇嘅地方。應該保育佢,唔係問都冇問就填咗佢,當無事發生」。
與李先生同行的攝影師馬先生,則多拍攝建築和室內設計。他說,香港較多高樓大廈,甚少有遮蓋式的建築埋在地底,「仲要山頂上面,唔係平地,所以好特別」。他指,蓄水池歷史悠久,值得留念和保育,「香港呢類古蹟係越來越少,香港歷史會慢慢消退,留返低佢可以教育下一代上世紀嘅歷史」。
已在主教山晨運十多年的街坊陳女士指,不少街坊平日在山頂跑步,甚至會夾錢製作各式運動拉架在山頂上使用,近期才因工程才搬走。她說,沒想過地底原來有古羅馬式建築,認為應該保留,如果清拆會感可惜,「我覺得佢好靚。反正又唔係起樓,整好當個旅遊區畀人參觀下,又有位畀我哋晨運,我覺得okay。你拆咗佢做乜啫?拆咗填平都係起個球場畀我哋玩咋嘛」。
有逾百年歷史的「古羅馬式」蓄水池,部份紅磚砌成的拱門和石柱已遭工程破壞,碎片遺留在內。
-----------------------------
-----------------------------