【反滅聲撐新聞自由　今日上街】
楊宜興第一次接觸傳媒，是為了守住老父的心血。父親半世紀前創辦兩發麵廠，40年前在太子基隆街56號唐樓地舖開設門市。2010年10月，麗新發展計劃申請強制拍賣，麵廠堅拒就範。在團體協助下召開記者會披露事件，發展局隨即澄清該唐樓不受強拍影響，發展商未能得逞。他首次體會到傳媒監察的力量，「如果冇新聞自由，就變咗強權國家」。

強拍風波在一星期內得以解決，兩發麵廠繼續經營至今，街坊也慶幸老店猶在。二哥楊宜興說，當年事件經本港傳媒廣泛報道，甚至歐美媒體也有轉載，有移居海外的朋友知悉後紛紛來電問候，甚至有熟客回港時專程到麵廠打氣，「因為有言論自由，能夠傳到世界每一個角落，有華人嘅地方就一定知道」。
他記得當年李慧玲曾邀請他們三兄弟上電台「開咪」，向公眾講述事件和感受，認為她正直、敢言，肯為弱勢社群發聲。他對於李慧玲被解僱也感突然，「如果佢做得唔啱，你可以直斥其非，但佢冇做得唔啱，咁以後仲有邊個敢出聲？」他說現時社會貧富兩極，向金融、地產嚴重傾斜，趕絕很多小商戶，「好多嘢我哋市民唔會知，要傳媒報道出嚟，等個個都知道就可以形成一種力量。如果唔係就變成各家自掃門前雪」。
楊宜興坦言，香港的自由空間逐漸收窄，「好似示威咁，趕你走埋一邊」。一場強拍風波，讓他知道新聞自由的重要，「有個渠道畀我哋發聲，令到不公義嘅事情畀廣大市民知道」；還有言論自由的可貴，「如果唔係好多嘢都可以為所欲為，就算知道都冇人敢出聲」。他支持今天「企硬 反滅聲」遊行，「團結先係力量，你唔團結咪一盤散沙，唔公平嘅事一定要出聲」。
記者 王家文