【韓流】五次體檢唔通過 30歲劉亞仁被判唔使服兵役
兵役劉亞仁骨瘤
現年30歲嘅韓劇《六龍飛天》男星劉亞仁,今年初被診斷出有骨瘤,雖然骨瘤屬良性,但亦令劉亞仁遲遲唔通過當兵體檢。
今日韓國傳媒報道上月進行第五次體檢嘅劉亞仁唔通過體檢,被判定為免除兵役。其事務所UAA經確認後發表官方立場:「兵務廳對劉亞仁嘅兵役做出判斷結果,劉亞仁因為原有嘅疾病,喺今日被兵務廳判斷為免除兵役。公司會先考慮演員嘅健康,積極配合治療。」
據了解劉亞仁患骨瘤對佢日常生活帶來巨大嘅疼痛,需要長期接受治療,但由於骨瘤不斷擴大,最終判定為唔適合服兵役。
對於劉亞仁唔使服兵役,韓國網民就話唔公平,又留言話呢啲事普通人諗都唔敢諗,又指冇錢冇背景嘅普通人,即使有病仍然要服兵役,覺得事件好唔公平。