馬詩慧（Janet）同徐濠縈今晚喺調景嶺香港知專設計學院出席年度形象設計展擔任評判，阿徐一身時尚look現身，但只拍照不受訪。Janet喺現場見到學生嘅相好深刻，笑言：「搞到我都有少少考慮嚟讀書。」Janet唔介意幫助推動教育，香港人應該幫助香港人，協助新一代入行係好應該。

Janet細女王麗嘉（Irisa）有意做model，Janet話:「呢啲係要慢慢浸淫出嚟，網上可以有好多資訊參考，有天份好容易get到。」咁阿女成日性感露胸影相係咪媽咪教？Janet話：「梗係唔係我教，佢露與唔露，露得靚係一回事，有啲猥瑣，露得唔靚我會第一時間叫佢唔好影，我都曾經講過唔趁o依家騷，等跌到落腰先嚟露咩。」阿女密密post相，Janet就話o靚仔o靚妹日日都post，佢都都成日有新相，只不過冇咩迴響。

媽媽好開明，但爸爸王敏德就好介意阿女成日影性感相公諸同好，Janet直認：「老公好保守，外表係鬼佬，內裏係傳統中國人。」有冇教化老公要思想開放？Janet話：「冇得教化，慢慢等佢接受，有時唔到佢唔接受，佢唔敢話啲女，佢好精㗎，佢做好人，等我做壞人。」