熊黛林早幾日到郭富城屋企狂歡33小時慶祝28歲生日，宣示天王嫂地位，之後仲獲城城安排6個保安護送返屋企，認真巴閉。不過，熊黛林嘅同門師姐名模姚書軼（Mikki）就狂寸熊黛林太高調，又話自己都要做地王嫂，講說話句句有骨。前晚熊黛林同Mikki以及公司成班model齊齊喺尖沙嘴影靚相，逗留到夜晚10點先至影完，佢哋兩個一前一後咁行，兩個人好似冇乜交流咁款。

「乜嘢叫高調？」

馮仁昭同熊黛林講Mikki話佢太高調，熊黛林即時嘴扁扁話：「乜嘢叫做高調呀？我都係正常咁去朋友屋企啫。」問覺唔覺得俾人寸同唔開心，佢話：「唔係嘅！每個人講嘢唔同，我唔會唔開心。」咁究竟係咪戀愛大過天？熊黛林就話：「呢啲係你哋講㗎咋，唔係我講，我𠵱家返屋企，你哋收工啦。」咁究竟返自己屋企抑或城城屋企？佢即刻好大反應咁話：「梗係自己屋企啦。」之後熊黛林由秘密通道離開，成功避開耳目。
至於Mikki離開時，被問到跟熊黛林見面尷唔尷尬，佢話：「唔尷尬。」再問佢寸對方太高調呢件事，Mikki竟然反口唔認話：「冇啦，我都冇講過。」