近呢幾日天氣陰晴不定，放假先嚟落雨，確實影響市民心情。不過，喺憂鬱嘅星期一朝早，西區對開海中央有道雙彩虹曇花一現，吸引咗唔少市民嘅目光，亦驅走心入面嗰股鬱悶。唔少市民都對呢個奇景讚好，覺得相當幸運。

呢嗰奇景喺今日朝早出現，當時香港多區都有毛毛細雨，雙彩虹喺西區對開海面中央升起，穿插入雲層裏面，特別顯眼。再加上晨曦嘅陽光照射下，維港兩岸高樓大廈反射出粼粼金光，加上雙彩虹嘅點綴相映成趣。

居住喺尖沙嘴嘅讀者阿Win表示，今日朝早6點45分左右起身，當時天色一般，陰陰沉沉，但定眼就望到窗外嘅一道雙彩虹又長又大，仲話住咗十幾年第一次見到呢個場景，覺得好驚訝，不過道彩虹只係維持大約5分鐘就消失。

讀者梁小姐今日朝早7點06分亦喺薄扶林道嘅大學宿舍見到呢幕，佢話雖然雙彩虹只係出現咗兩分鐘，但覺得好新奇同罕見：「因為通常彩虹喺天上面，但佢只係得下面果截，喺雲度同個海連住。」有網民喺facebook上載圖片，唔少網民見到雙彩虹都留言讚好，有網民指喺雙彩虹下面游水，「感覺很fantastic」， 亦有人話「見到雙彩虹，好運齊來」。

香港以往出現過幾次雙彩虹，其中前年6月29日清晨，西區同樣見到一道雙彩虹高高掛喺天上，當時市民拍攝到嗰道彩虹更為完整，兩個半圓形由海面劃成彩虹大門，令見到奇景嘅市民都嘖嘖稱奇。事隔唔夠一個月，前年7月26日，熱帶氣旋「銀河」悄然離開香港之際，香港多區出現彩虹，其中北角、銅鑼灣更一度出現雙彩虹，唔少市民舉機拍攝。

你敢爆，我敢獎！ 即Call《蘋果》24小時爆相爆片熱線 ：63836568