上海街的戰前騎樓式唐樓，市建局活化後，以優惠租金出租予油旺區的小店。其中「常常集品」主要售賣古道具及古家具，創辦人Kenneth在油麻地有一間樓上舖，但被上海街的騎樓及麻石柱建築特色吸引，決定在上海街開分店，叫上海街貳店，店舖開業短短三星期，曾有舊街坊回來分享昔日生活點滴；亦有街坊將家中木製品送贈，只為讓更多人認識到傳統工藝。

Kenneth稱，港人對古道具的認識不多，「主要係舊嘅生活器具，有啲古家具好似木箱、木櫃都會有出售，所有木製品都是入榫，而日本對舊物保存得好好，好珍惜以前遺留落嚟嘅物品。」上海街貳店也有寄賣不少本地收藏家的珍藏，但部份屬非賣品，「有少量器物、紙品，有啲收藏家會將物品放喺呢度，好似國泰（航空）80年代未改logo嘅飛機餐杯，有啲賣、有啲就唔賣，因為香港比較少平台、小店可以同人分享佢哋嘅物品，唔少收藏家想放喺呢度畀多啲人認識香港以前嘅舊物。」

日本昔日生活器具，與活化後的上海街歷史建築像「大纜扯唔埋」，其實Kenneth希望改變港人對舊物的態度，「香港以前嘅舊物都可以好靚，但可能香港人對舊物嘅感覺係唔要嘅嘢、係被人棄置，喺夜冷舖先搵到」，但其實每件舊物均承載了一個故事。

他稱，上海街貳店開業短短三星期，曾有舊街坊回來跟他分享昔日生活點滴，「有位先生同我講以前住喺呢度樓上，一梯八伙，隔籬係賣椰子同賣錶。」最令他難忘是一名住在對面唐樓的街坊知道其店舖的理念，特意將家中的木製品送贈，「佢係住喺對面唐樓嘅街坊，嚟咗好多次傾偈，佢送咗3樣畀我哋，包括一個木枕頭，佢係原木一件過，冇任何接合，香港以前都有木匠會做木器具，但現時已經越來越少人做，或者已失傳，另一件係迷你牌九，仲有一件我同佢都唔知係乜嘢，可能要靠大家估吓。」

Kenneth稱，在活化歷史建築開店，最喜歡是人與人之間的互動，「就好似嗰個街坊咁，遇到佢又聽到有趣嘅故事。」他直言，有關珍藏為非賣品，但會在店內展示，「個街坊都想將呢啲工藝畀多啲人睇到。」

另一間小店「黑地」為山貨店，除了賣「砂煲罌罉」，也有賣港產駱駝牌玻璃膽暖水壺、紅A牌產品，甚至較少見的玻璃中式匙羹。負責人阿鵬稱，在石硤尾地舖售賣雜貨已3、4年，遷至上海街因「以前未填海呢度都係山貨舖雜散地」，更直言初時對活化上海街不感興趣，「都驚佢做假古董，但睇過之後，雖然都覺得有啲地方可以做得好啲，但整體活化得唔錯。」開業近一個月，阿鵬直言生意額有增加，最重要是可以與客人互動，「佢哋見到啲嘢熟口熟面會入嚟，攞上手（貨物）就話，我以前都係用呢啲⋯⋯大家冇乜距離、有親切感。」

記者　譚靜雯
-----------------------------

民陣元旦大遊行

日期：2020年1月1日
時間：下午2時集合
路線：維園中央草坪至遮打道行人專區
主題：毋忘承諾 並肩同行
*不反對通知書申請中
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
無懼警暴 學懂自救
《抗暴之戰●法例須知》讀果 上架
-----------------------------
【撐學生】
召集有心人 撐學生全年睇《蘋果》
立即按此