陳志雲為亞視主持嘅《百萬富翁2018》今日安排喺亞視總台探班，陳志雲話呢個節目喺明年1月29日開始，逢星期一到星期五夜晚9點播映，因為要有存貨嘅關係，所以佢哋喺明年1月2日開始錄影，預計1日會錄影3集。

之不過話晒月頭錄影到月尾先播，咁啲問題咪會好容易外洩，對其他參賽者唔公平？亞視嗰方面就話：「我哋會同所有觀眾同參賽者簽一份保密協議，節目出街嘅時候，家庭觀眾除咗回答節目嘅問題之外，百萬女郎每一晚都會有三條全新嘅問題。」

今年係《百萬富翁》呢個節目推出20周年，喺全球好多國家都有一齊推出，陳志雲話自己都覺得有壓力：「我喺屋企練習，成日喺度講《百萬富翁2018》今晚正式首播，搞到家務助理以為我傻咗，我都有睇全球《百萬富翁》主持嘅特質，做呢個主持要配合音效，要夾得好準。之前陳啟泰兄以往真係做得好好，天衣無縫！」

佢又話《百萬富翁》嘅版權持有人都有派代表監場：「佢哋有成隊人過咗嚟，停機嗰陣都有同佢講細節同俾啲意見，好似邊啲要節奏緊啲，又啲地方講得又太慢，我都唔希望自己做得唔好，話晒今年係20年！」唔知佢又有冇碌人情咭搵嘉賓？陳志雲話：「佢哋都冇叫我出動，但係我份人幾心急，有打電話問過啲朋友，有啲都ok，但係諗諗吓我都唔應該咁樣做，都要交返俾製作團隊去搞會好啲。」

更多娛聞，喺晒《娛果》
http://fb.com/appledailyent