亞視執董葉家寶因縱容亞視拖糧,最終被判罰15萬元,家寶與眾亞視藝人離開法庭後,向傳媒透露心聲,不過被問到該15萬是由他自己付,還是公司替他付款,家寶則沒有透露。
葉家寶說:「呢個案情經歷咗一年,由遲發人工開始,超過四百日,過往日子係百感交集,今日告一段落,我好感謝過去咁多支持我嘅朋友﹑家人及唔同年代嘅老闆,我亦好感謝好多我唔識嘅朋友為我祈禱,我相信神係聽到我哋呼聲,所以今日我亦相信法官,亦聽到我喺庭上所講一切說話,同埋社會各界人士及公司人士所作求情,佢係作咗一個比較佢個人覺得好特殊判決方法,我亦相信香港法例好嚴謹,我只可以講,喺今次事件中,我學咗寶貴一課,我諗人生係要不斷學習,人生亦充滿挑戰,我喺度呼籲將來每個遇到困難嘅朋友,要堅持及努力面對,好多困難都可迎刃而解。」
不過葉家寶仍有不解地方,他說:「我不解嘅係,我始終係一個受薪嘅僱員,0依家因為喺當今勞工法例之下,我居然一個受薪僱員,都係被判上一啲刑責,呢個係我自己有啲不解,我希望未來懂得點去謹慎處理公司每一項有關發薪金及員工福利問題。」
有記者問:「唔應該告你,因為始終係受薪?」葉家寶只說:「我只可以話,香港法例好嚴謹,我自己好感恩,今次判決係咁樣,到底跟住方向會點,暫時我冇認真研究,案件總算告一段落,我希望以後喺人生不同崗位方面,本住自己良心,做自己覺得一啲合理事情。」