蘋果擁躉itsybitsy就話：「如果喬布斯因貪欺詐，就應該由佢自己獨力承擔、送佢入獄，絕對唔希望見到蘋果電腦因為CEO行為失當而垮台。」Sleuth2對於企業相繼爆出認股權醜聞，歸咎當局監管過鬆，「如果喬布斯真係有罪入獄，希望到時佢嘅iPod喺獄中可以大派用場。」
不過，citizenjj就為呢班高層平反，佢話無論係巨企定中小企、高層定基層都總有害群之馬，呢啲係人性醜惡，與職級無關。sugarmelter就話：「好似喬布斯呢啲位高權重嘅CEO，年薪其實只象徵式收1蚊美金咋！」根據《維基百科》嘅資料顯示，喬布斯多年來只收1蚊年薪，係健力士世界紀錄大全最低收入CEO嘅保持者。不過，佢每年會收到董事局嘅厚禮作為報酬，當中包括喺99年獲贈價值4600萬美元嘅飛機，及00至02年收到3000萬股限制性股票。