【時移世易】曾經，監管者與被監管者之間，可以福至心靈有偈傾，拍住上為拓展市場投石問路，甚至退休後繼續吹水打波。不過2008年金融風暴後，環球市場生態改寫，有偈傾的日子漸行漸遠。袁鯤濤（Anthony）回憶稱：「以前溝通係幾頻密，只要唔違反（公平合規）大原則，好多時都有偈傾，甚至我哋會叫金管局幫手做啲嘢改善市場環境，佢哋亦會好receptive（接受）。」

金融風暴後監管趨嚴

像1991年香港外滙同業聯會首次訪京，也是金管局前總裁任志剛穿針引線，又如2006年財資市場公會成立，也是官商推動的成果。「我自己同任生都幾熟，相識多年，佢作為總裁同市場人士幾接近」。當年江湖傳聞，金管局欲延攬袁加盟當任志剛副手。對這段往事，Anthony間接默認曾被獵頭公司接觸。「有諗過嘅，但係諗吓囉……我覺得唔適合，可能我由始至終都係自由市場（參與者）」。

一場金融風暴，全球監管尺度從此沒有最高只有更高，「係世界趨勢，有偈傾變咗好多嘢係冇得傾」，監管機構亦未必再像以往跟市場多接觸。訪問在Anthony柴灣工廈的私人辦公室內進行，單位分成三個獨立單元，兩位鄰居是2009年底退休的金管局前副總裁蔡耀君，以及富邦香港行政總裁兼董事總經理李永鴻。三人夾份買工廈單位做吹水站。賓架與監管者能如此friend，信焉。