曾擁有9項香港游泳紀錄的方力申，坦言游到見到水都怕，相隔15年他再度挑戰自己，為慈善「處男下海」圍繞香港島一周。日前他在上環接受專訪，39歲的他希望藉此證明自己仍然有魄力：「我想做一件值得人哋支持我嘅事。」

小方將於11月初舉行「圍港游」為點滴是生命籌款：「07年做佢哋嘅大使到而家，上年呢個機構20周年，我哋每位大使都自發地想做啲嘢幫手籌款。我以前都搞過藝人慈善活動，將藝人畫嘅畫、影嘅相、手作仔拎去義賣，今次，我想做難啲嘅嘢。」他笑謂可以選擇1個月減20磅曬腹肌，也可以選擇一口氣吃10個漢堡包，但這次想更有意義及值得別人捐錢支持的事，對於前游泳健將來說，挑戰「圍港泳」似乎是最佳選擇。

29歲那年，小方曾經跑過人生唯一一次馬拉松，10年後，小方挑戰「圍港游」：「全程45公里左右，長過馬拉松少少，如果我游到個馬拉松都幾叻仔呀。我想話畀人知，我唔係運動員都有魄力，我唔認老，自己又係土生土長香港人，咁就喺邊度落水邊度上水，呢件事會令我畢生難忘。」但是曾經最叻游泳的他，15年來從未有認真游水：「去旅行落水拍下片、影下相就會。嗰時我見到水就驚，但係當我跟佢哋去探訪，見到好多人冇水仲驚。呢啲事令我好感恩，更加想去幫人同埋做人善良啲，所以就促成呢個諗法。」

為了籌得目標數字450萬元，小方表示會碌盡人情卡：「我會叫啲有錢朋友支持，爸爸？佢唔得啦。藝人朋友又好難叫佢哋捐錢，Paco（黃柏高）我就會叫，家庭醫生都好支持我，唔收我錢，送咗包暈浪丸畀我，哈。」另外，他將有4名陪游打氣員，小方透露已經邀請了歐鎧淳：「我仲諗住拖埋細佬落水，一齊感受下個維港有幾污糟、啲浪有幾大咁囉。」

不想認老的小方自嘲體能大不如前，他說：「以前攰，你都覺得自己捱到，而家唞即係等兩個字：『收皮』，個人係完全冇電又好肚餓。游17公里嗰日，我有啲脫水自己都唔知，而家落水嗰陣，每個鐘就要食嘢飲水，薯仔湯、薯蓉呢類單糖（monosaccharides）食物補充。」他表示「圍港游」期間，不能休息、不能扶任何東西，連進食也要邊踢水邊食，對於生理及心理狀態，都是很高強度的耐力測試。

轉型做藝人已經20個年頭，小方坦言做藝人太被動，對於工作有點惘然：「做藝人，你唔知點樣可以做得更好，點樣可以令成績更好，你唔知做完有咩回報。做運動單純好多，你知道只要快過噚日就係有進步，回報好易掌握。」做藝人方面，小方自言好勝心不夠強：「好多嘢我都冇所謂，就算做運動，跑步、打籃球，我都唔介意輸贏，惟獨游水真係有好勝心。而家個游水教練細我10幾年，唔知點解都好想游得快過佢，明知自己未準備好，都好想快啲。喂，咁我以前叻，而家冇理由唔得㗎嘛。」

採訪：盧妹
髮型：Vince Pang Of IL Colpo Playinum TST
化妝：Yen Lai
場地：AKVO Hotel

-----------------------------
【撐學生】
召集有心人 撐學生全年睇《蘋果》
立即按此
-----------------------------
《囚牢之疆》 專頁
揭開集中營邪惡面紗
今日新疆 明日香港