政府噚日朝早喺灣仔會展舉行中共建政升旗禮同慶祝酒會，除咗前特首煲呔曾因入獄未有現身外，另一前特首、政協副主席董建華都罕有唔見影。有政府中人同八方講，老董冇嚟，估計同呢兩日佢去北京出席政協會議有關，只係因為佢年紀大，無近期頻頻高調評論時政，惹來復出參選特首傳聞嘅前特首、政協副主席梁振英咁chur，為求博曝光，漏夜都搭飛機出席酒會箒，大家唔使太多聯想。老董其後就透過公關回應八方查詢，話因為去咗北京出席政協會議，所以出席唔到升旗禮，但今晚會出席返國慶文藝晚會喎。

酒會勁chur　同梁粉敍舊

事實上，689噚日真係幾chur，喺台上酒會儀式完結後，留喺現場嘅時間仲長過娥特，其後更唔知有心定咁橋，企正喺傳媒嘅豬欄面前，同唔少「梁粉」合照兼敍舊，包括曾因被網民質疑扮跌倒成名的港大深圳醫院院長盧寵茂、工聯會前議員潘佩璆等。有「鐵梁粉」之稱的發展局政治助理馮英倫，更由「娥營」即時重投「梁營」，同689握手兼嚟個大合照。
一眾傳媒見689企正喺面前咁耐，當然唔會放過問佢係咪諗住復出參選特首，但689就貫徹佢做特首時嘅作風，聽到問題就快閃離去，其間更一度漏低咗以「半龍蝦裝」示人、一身紅色上衣的老婆唐青儀，最終唐青儀要G4上前提醒，先急步搵返老公。