曾經係眾多宅男心目中女神嘅日本女星佐佐木希，今日着住婚紗出席佢擔任模特兒嘅雜誌《with》主辦嘅婚紗活動，同場仲有搞笑男藝人綾部祐二伴住佢。

佐佐木嘅新娘look就非常之高貴，因為佢個皇冠頭飾價值成7,560萬日圓（約575萬港元）。有記者問佐佐木，着得婚紗次數越多，就越會遲婚，問佢驚唔驚會好遲先至結婚，佐佐木話：「唔緊要，為工作着婚紗冇所謂。」佢仲話相信自己要30歲之後先至結婚。

雖然一身新娘打扮好靚，但係佐佐木明顯發福唔少，有日本網民直頭話覺得佢走咗樣，而同佢以前嘅照片對比，佐佐木面部真係發脹咗好多，個樣同以前差好遠，可能連宅男粉絲都未必認得佢。