美國紐約市日前搞咗個「林柏特日」，佢效力嘅紐約城更加喺主場對華盛頓聯隊場波之前，整咗個儀式祝賀林柏喺球員生涯射入300個入波。不過，英國《天空體育》今日就踢爆紐約城其實係計錯數，喺林伯射入300球之前已經搞咗呢個慶祝儀式！

《天空體育》話根據佢哋嘅統計，林柏特喺鬥華盛頓聯隊場波之前，生涯入波數字其實係299球，佢喺果場波梅開二度之後，呢個上字去到301，先至真正經歷呢個射入300球嘅時刻。咁到底紐約城喺邊度出錯呢？根據報道，問題出喺1999年果陣......

當時林柏特仲係效力緊韋斯咸，球隊喺英格蘭聯賽盃8強對阿士東維拉場波，林仔（果時仲未係阿伯）果場有入波，球隊仲贏埋㗎。不過槌仔幫果場比賽派咗個唔合資格嘅球員上陣，搞到要重賽。林柏特喺重賽都有入波，但韋斯咸今次就輸咗。報道話，紐約城就係喺呢度出錯，將取消咗果場比賽嘅入波都計埋，結果咁就多咗一球啦。

其實錯嘅唔止紐約城㗎，早喺兩個禮拜之前，林伯喺自己Instagram都出咗post，話自己已經射入球員生涯第300個入波，睇嚟佢自己犯錯，結果都fake埋紐約城，結果一齊攬炒！