流感高峯期將至，逾廿位唔同黨派議員響應食物及衞生局局長高永文呼籲，噚日喺立法會宴會廳接受季節性流感疫苗，點知由醫入政、三年冇操刀嘅高永文，席間竟被新民黨田北辰同人民力量陳偉業要求親自操「針」，雖然兩人被針拮到狀甚痛苦，但又大讚民望高手勢好喎。
一眾議員昨輪流接受評估，再逐一由護士打針，其中民建聯陳克勤打針時狀甚害怕，陳志全則未能摺高衫袖仲索性除埋。本身係骨科醫生嘅高永文雖然在場，但佢一早講明唔會為議員打針，因為「我打親（都係）大關節」，自言好少作肌肉注射。

田北辰大讚「好手勢」

點知輪到田北辰時就誠邀民望高出山親自拮佢，民望高惟有順應民意，雖然二少個樣好痛咁款，但被拮後大讚民望高「好手勢」，民望高謙稱：「最痛一定係呢針。」隨後嘅陳偉業不甘後人，又要求民望高操針，仲話：「佢（高）等咗好耐啦，報仇呀！」
經民聯林健鋒同民主黨單仲偕事後不約而同指，由醫生打針做法不智，因為醫生唔係經常負責打針，技術一定唔及護士，唔通暗示兩人要求局長操針係博宣傳？
特首梁振英昨早亦連同5名局長，包括陳茂波、張建宗、張炳良、陳家強同楊偉雄，齊齊接受疫苗注射。
民望高話政府購入咗40萬劑流感疫苗，應付季節性流感，希望社會提高關注。

李八方
mailto:[email protected]