星爺周星馳轉戰財經圈後，動作不斷，勢要借旗下比高（8220）喺內地電影業大展拳腳，做中國影業大亨。不過，近期就似乎有些少阻滯。話說比高今個月中公佈嘅配股計劃，噚日再一次估佢唔到，突然叫停。公司復牌，股價難免急瀉，星爺「抽水」唔成，自己荷包反而先縮水，賬面計唔見咗成億銀。
比高發通告，話考慮過當前市況後，配售同認購各方都同意終止配股交易。比高今個月中公佈，計劃向6名投資者配售5.5億股集資。比高董事局認為，叫停配股對集團業務同財政狀況都唔會有大影響。

股價勁跌24%

可惜市場似乎唔係咁諗喎，比高噚日復牌，勁跌24.2%，收報0.185元。以星爺家陣持有17.26億股計，賬面身家蒸發1.02億銀。不過，星爺01年套《少林足球》，傳聞當年都收1500萬片酬，事隔10年，正係今時唔同往日，賬面唔見1億，應該唔係幾肉痛啫。
講真，今次比高配股都咪話唔多波折，之前諗住先舊後新配股，點知繙譯錯變成星爺沽貨，今次仲觸埋礁㖭。查實比高諗住未來3年，每年喺內地開12間戲院，單計今年已經最多要投資2.4億人仔，配唔成股，以集團手頭現金1.1億嚟睇，星爺個電影院大亨夢似乎有變數。

李華華
mailto:[email protected]