韋達對上兩戰食白果，今晚去到第六場三班二千二米，卒之威番次，佢騎苗廐「雄心巨龍」醒過醒目仔，見早段「勁新鮮」放到離行離列，未轉直路彎已經抄出外叠望空上前，結果直路率先突圍6.6倍建功，智取眼中釘雷神，以馬頸位之先，氣走雷神之大熱門「安荃」，韋達捧走維多利亞賽馬會錦標，兼幫第二場已贏「好事必得」之苗禮德埋齋起孖。
反觀「安荃」礙於孭133頂磅，雷神唔敢太早發力，留到末段發力卻為時已晚，追極都追唔到「雄心巨龍」屈居亞軍。「勁新鮮」前段放到甩晒轆，拉士力弱都頂到第三，第四名係「自由式」，四重彩派八千七百幾，三T正獎落空，中頭兩關安慰獎收22萬，有170幾萬多寶撥落下星期三夜馬。
前馬王「雄心威龍」日前舉行退役榮休儀式，當日韋達穿上該駒綵衣參與其中，估不到幾日後韋達策同一綵衣的同主馬「雄心巨龍」建功，似冥冥中有主宰。