人有相似，何況係圖？但如果太似，難免有抄襲之嫌！灣仔區議員楊雪盈喺facebook貼相，一張係佢嘅辦事處舉辦嘅「有糭大坑」活動嘅宣傳圖，另一張係新民黨青年委員會副主席、落選港姐劉聖雪招募派糭義工嘅宣傳圖，雖然用色不同，但格式風格近乎一樣，楊雪盈指佢議辦製作嘅圖5月4日已經發佈，「感謝」劉聖雪欣賞佢哋嘅設計，「不過我們希望劉小姐能尊重知識產權，『參考』我們創作部同工作品前可事前告知及得到批准」，仲誠邀會面交流創作心得，hashtag「希望佢（劉聖雪）啲粽料好似佢抄得咁足就好」。

八方問過劉聖雪，佢承認兩圖設計有啲似，但認為「欲加之罪，何患無辭」？解釋網上都有唔少圖像嘅款式設計，有時都會參考，唔同人都有不同演繹；強調想集中精神做好地區工作，對此小事只會一笑置之！