電視圈鹹豬手事件，成為全城熱爆話題，陳豪、馬德鐘、吳卓羲和蔡子健更捲入風波之中，無綫前日率先召見了爆料的苑瓊丹（苑仔）和捲入事件的蔡子健作出了解。牽涉入事件的男藝人，紛紛獲紅顏力證人格，其中鍾麗淇非常體諒舊愛蔡子健的心情，對他不離不棄，還發短訊慰問。

苑瓊丹早前在電台節目踢爆娛圈再現鹹豬手，立即熱爆全城，陳豪、馬德鐘、吳卓羲和蔡子健更捲入風波中，無綫對此高度重視，前日安排高層接見苑仔了解，同時也召見蔡子健。雖然鹹豬手真身未被揭發，但捲入事件中的幾名男星，昨日分別獲緋聞女友力撐人格。

保持聯絡
新年約會自稱兄妹

曾主持兒童節目《閃電傳真機》的蔡子健入行多年，緋聞不多，僅在2000年被爆與鍾麗淇拖手出席歐米茄活動，當時他們一見記者拍照即迅速彈開。其實鍾麗淇97年已與梁榮忠拍拖，但最終因男方在05被揭與朱慧敏發生車震而分手。
鍾麗淇對於蔡子健捲入鹹豬手風波，不但沒與他劃清界線，昨日還挺身力撐，她在電話訪問中說：「我有睇新聞，我相信子健份人，我點都支持佢。我哋喺99年一齊去尼泊爾拍旅遊特輯，當時相處咗成個月，大家仲成為好朋友。」有傳二人曾拍拖，她說：「我哋係close到似兄妹啫，我相信子健係無辜，呢個時間講乜都冇用，最好係清者自清。」
問到鍾麗淇對蔡子健的印象？她說：「佢份人好nice，我哋咁多年朋友，成日都會聯絡，兩星期前我先約子健同魯文傑一齊食過飯。」鍾麗淇體諒蔡子健現時的心情，她謂只發短訊慰問，她說：「我都明白呢個時候，佢一定有唔開心，所以我只係發SMS畀佢，暫時佢都未覆，或者等件事冇咁麻煩先搵佢。」
記者昨日多次聯絡蔡子健，他最終以「謝謝關心」四字的短訊回覆。蔡子健跟無綫只有藝員合約，其經理人Sunny昨日說：「子健噚日返無綫係傾工作，佢捲入事件都有唔開心，不過佢話冇嘢再回應，想盡快settle件事，費事越描越黑。」至於蔡子健老友魯文傑就不願多提鹹豬手事件，他昨日說：「我新年前係同子健食過飯，但始終唔清楚件事，我冇乜嘢意見，大家咁大個人應該知點做。」
雖然苑仔前晚接受無綫節目《東張西望》訪問，再三強調事件與陳豪無關，陳豪紅顏知己廖碧兒昨日也在電話中解畫：「我相信陳豪真係好無辜，咁樣對佢好唔公平，佢份人真係好好，呢件事會影響到佢日後嘅工作，如果遲啲佢要拍親熱戲，咁會令佢同其他女對手之間好尷尬。」江若琳和吳卓羲去年合作無綫劇集《學警狙擊》傳緋聞，她昨日說：「我同佢合作過，佢好照顧人，對人好好，亦都好尊重女性。」

害群之馬
馬德鐘勸自動消失

雖然陳芷菁前日已澄清馬德鐘並非鹹豬手，馬德鐘的紅顏知己佘詩曼昨日仍極力維護他：「我絕對覺得我啲朋友係正人君子，馬德鐘有老婆有仔，絕對唔會咁嘅。」馬德鐘則說：「大家都知唔係我，都會覺得無辜㗎。雖然冇人頂證佢，不過今次件事可以警惕佢唔好變本加厲。我覺得啲女仔好慘，有事嘅時候好慌亂，唔識即時求救，過兩日又不了了之，應該大聲呼喊。」馬德鐘指鹹豬手是害群之馬，影響藝人名聲，他說：「佢應該自動消失啦，自己知自己事，就算唔係做呢行都要檢點，刑事嚟㗎。」
採訪：林妃

官恩娜籲開估

魔術鹹豬手成為城中熱話，一班女藝人繼續議論紛紛。其中經常與蔡子健合作的楊婉儀，表示未看過他表演魔術；官恩娜則認為應公開鹹豬手的名字。

官恩娜：我喺TVB冇人表演過魔術畀我睇。我覺得應該公開鹹豬手嘅名，唔好畀佢逃之夭夭。

陳法蓉：都有試過俾人掂到唔想掂嘅部位，女仔會feel到有心定冇心，如果遇到啲咁嘅情況，我會兜巴星，大腳踢呢啲人。

楊怡：可能只係同事之間誤會，未必係報道咁嚴重，總之女仔要保護好自己。

楊婉儀：我同佢（蔡子健）合作多年，覺得佢幾好人，大家都幾合拍，不過佢就冇表演過魔術畀我睇。

葉翠翠：我覺得應到此為止，畀個機會佢，如果真係有人再受害就要開名。

曹敏莉：總之一切都公司話事，都影響唔到我，女仔都識得保護自己，同異性要保持距離。

採訪、攝影：王崇穎、胡比