當年今日

熱捧里賈納贏祖記
假日求驗客手記:意甲盤口盡在莊家手

蘋果日報 2003/05/17 00:00


意甲呢幾周賽事有好幾場戰果都喺莊家掌握之中,淨係嗰啲熱到離晒譜嘅和波盤口,我求大俠都喺度提醒大家好幾次要吼實。呢個禮拜繼續要信盤口,好似摩德納對國米又好大機會和局,而里賈納主場更似乎穩勝已封王嘅祖記㖭!
摩德納今日主場對國米,和波又試得番一賠一嘅分頭;近幾個禮拜,有好多場意甲波都出現呢種情況,結果真係和局,唔到你唔信!
今日重有一場比較令人意外嘅盤口,就係里賈納主場對祖記。主隊贏波賠率得嗰一點六倍多啲,捧祖記W就有成五倍分頭,好吸引啫!但係里賈納前鋒邦拿素利賽前話「好有信心」贏得,呢啲隨時真係內幕料!你知啦,意甲波古怪多多,既然之前話要和嘅比賽就真係和波,唔排除真係有人操控戰果,咪盲目捧強隊呀!

馬田斯貪玩累事
國米今屆真係黑過墨豆,前鋒馬田斯話前幾日對AC時扭傷背部,今日作客摩德納要缺陣。唉!國米冇咗韋利已經唔多掂,傷愈復出嘅基斯普又麻麻哋……馬田斯,唔好話我求大俠唔提醒你,你受傷原因可能同你嗰日對AC入咗波後係咁打觔斗有關,真係「戲無益」呀!

科拿獨自提早開操
踢完成個球季,啲球員都希望利用唞暑期間去玩吓。不過曼城嘅科拿就被領隊基瑾下令,要佢提早開操。難得科拿又應承喎,不過佢呢兩季又真係無晒以前喺利物浦時嘅射手風采,重愈踢愈沉。呢次當為自己又好,為報知遇之恩又好,畀我求大俠都唔介意啦!
遼寧小心玩殘李鐵
李鐵已經返咗祖家,東亞盃推遲後就喺屋企休養。佢同「拖肥糖」嘅借用合約完咗,𠵱家屬於遼寧嘅球員,會方有人諗到如果甲A六月初重開,不如搵佢踢幾場谷吓入座率。不過李鐵當然想休息吓啦,我求大俠都勸遼寧唔好整殘佢,否則傷咗更加唔使同愛華頓傾長約。

英國莊家烏龍益球迷
喺八月香港賭波規範化,不過馬會千祈唔好好似呢個英國莊家咁烏龍。英國球迷加利喺季初用二百鎊(約二千四百港元)買愛隊洛達咸成功留喺甲組,本來賠率得兩倍,但同佢接洽嘅莊家助手竟然畀咗洛達咸奪標嘅六十七倍賠率佢;莊家初時唔認數,但由於佢哋白紙黑字寫低咗,惟有派彩,令加利淨賺一萬三千二百鎊。

富咸請高文勝在慳
托比慕拿雖然喺季中畀利華古遜炒咗,但上屆幫利華古遜攞咗三個亞軍,算有知名度,所以佢對富咸寧願搵冇教波經驗嘅高文做領隊都唔搵佢,覺得好冇面。計我求大俠話,富咸主席阿法茲耶係個生意人,既然有得揀,梗係揀人工平一截嘅高文!
逢周六、日見報