近期有一種說法，認為中美貿易戰係由科技冷戰所觸發，而中美貿易戰甚至只係科技冷戰全餐裡面嘅其中一個小點，講法至少相比特朗普突然發神經來得更合情合理。

科技冷戰緣於中國AI等等嘅新技術發展進度驚人，美國摸唔清中國底牌，自然感到極受威脅，美國出盡法寶阻礙對方跨國收購科技行業同投資，近期貿易戰係雙方其中一步棋嘅對奕。中國急急引科技企業返A股發CDR，被指係中國想喺資本市場層面獲得更大話語權，成為一定要做嘅政治任務。

美國智庫Eurasia Group早喺年初預警，科技冷戰係2018年十大風險之一。大家本來覺得，中美糾紛冇乜奇，邊一年冇先係出奇，而年初中美雙方角力仍然喺口水戰同阻撓收購等層面，於是一直被投資者當係non-event。甚至特朗普早幾日未落實時已傳徵收中國600億美元進口品嘅關稅，一直都未演化成市場資金流收緊嘅問題，但當Naspers配售騰訊前後，資金流急轉直下，中國極速還擊亦令市場感受到嚴重性，發酵嘅時間點殺人措手不及。

好在而家去深究亦未流於馬後炮，皆因一系列嘅爭端，斷估有排玩落去。假如大家開始相信中央搞CDR搞到咁急，係同科技冷戰有關，就要信埋科技冷戰已經不再non-event。

點樣透過市場去判斷科技冷戰成為重大事件？值得留意係舜宇（2382）同瑞聲（2018），星期五一隻跌逾5%，一隻跌逾6%，跑輸其他藍籌，舜宇大客華為係美國最猜忌嘅中國科技企業之一，瑞聲為蘋果供應商，自然身處風眼，如果兩隻股持續跑輸市場，各位對科技冷戰要更為關注。

至於對市場嘅影響，就係當股市充份反映負面因素嘅時候，反而接近中短線見底，反彈到事件淡化，投資者當冇件事嘅時候，又可能係見頂之時。當恐慌加劇時撈貨就拉低平均價，市場反彈到風平浪靜時就減持令持貨成本減低。

要留意CDR時間表，因為中國總有一刻要營造歌舞昇平好讓大型科技企業返A股順利着陸，到時美國亦未必及時再度出招，再配合4月股市淡季過後，政治任務仍有可能令市場出現大反撲機會，暫時觀察吓劇本係咪咁走先，但睇嚟未來幾個月大上大落依然係家常便飯。

晋佳
http://www.facebook.com/advanceguy1