各位，千祈唔好睇小屋企啲污漬，處理不慎，隨時令你萬劫不復──今日，我想講吓一段自己嘅親身經歷：

「阿偉，今晚我屋企冇人喺度，你收工可唔可以上嚟幫我睇吓個書櫃？」

好記得，當日喺返工途中聽到女友呢個訊息嘅時候，真係興奮到當堂大叫出嚟。我同小如拍拖將近一年，除咗拖手同Kiss之外就咩都冇發生過。本來我已經預咗要結婚之後先可以越過呢條界線，點估到會喺呢個平平無奇嘅日子收到一段「充滿暗示」嘅訊息……

但諗返都唔係完全無跡可尋，因為前排佢已經開始怪怪地，成日好似有嘢想講但又講唔出口咁，原來係為咗呢次「驚喜」。雖然用「睇吓個書櫃」呢個理由係怪啲（一般人都係用砌電腦）。但冇所謂，反正醉翁之意不在酒，前面全部都係藉口，重頭戲從來都係後半部份。

為咗呢晚能夠畢生難忘，我提早半個鐘離開咗公司，買好上等嘅牛扒同紅酒，浩浩蕩蕩咁上小如屋企。本來我都幾肯定佢見到會好開心，點知一開大門，隔住鐵閘嘅佢即刻皺起眉頭問：

「你……點解買咁多嘢嘅？」

聽完呢句我個心即刻一沉，開始懷疑自己係咪會錯意……但其實會錯意都只係小事。嗰陣嘅我完全冇諗過，自己好快就會面對人生最大嘅一場惡夢。

「我諗住……睇完個書櫃之後親自下廚嘛。」我行入屋之後講。

「親自下廚？」小如就好似聽唔明咁，我注意到佢塊臉有啲青白，雙手仲微微顫抖。

「小如，妳係唔係唔舒服？如果係……」

「阿偉，」佢打斷咗我，「其實今日我係故意叫走我嘅屋企人……因為，我唔想畀佢哋見到呢個情況……」

從小如嘅語氣，可以肯定佢指嘅「情況」同我兩個鐘前所幻想嘅嘢有住天淵之別。

「但裡面……裡面嘅情況已經越嚟越嚴重，冇可能再隱瞞落去。我真係好亂、唔知可以點做……」講到呢度，小如仲忍唔住喊出嚟。

「到底係咩事？」

小如舉起右手指向佢嘅睡房，示意我自己行入去望下。雖然呢刻我開始有種不安嘅感覺，但喺女友面前又冇可能逃避。猶豫咗幾秒，最後都係選擇行過去，途中腦海開始浮現各種可能性──唔通係佢整手作嗰陣錯手燒咗間房？抑或有動物嘅屍體喺房裡面……咪住，佢唔會係殺咗人啩？

結果，我全部估錯晒。

當我打開睡房燈，望見書櫃情況嘅時候，背脊真係即刻寒一寒。出事嘅位置，係電腦熒幕旁邊嘅嗰一面櫃身，有一處約莫半個網球咁大嘅隆起之物，顏色同質地令人聯想起受傷結焦時嘅模樣。而最詭異嘅地方，就係呢舊「異物」係會發出幽幽嘅紅光，仲不時流出黑色、睇落充滿黏性嘅液體，慢慢流落櫃面……

行到距離剩返一米嘅時候，「異物」嘅嘔心程度令我唔敢再行近，我擰轉身問：「妳係幾時開始見到呢舊嘢？」

「兩星期之前。」企喺睡房門口嘅小如回答：「最初只係得手指尾咁細，我仲以為係普通污漬，又或者係昆……昆蟲嘅竇。但我無論用咩清潔用品都擦唔甩，範圍仲慢慢擴散開去……最後就變成而家咁。為咗唔想畀屋企人知道，平時我係會擺幾本書遮住佢……」

「但、但去到咁嚴重嘅地步，點解妳仲繼續瞞住佢哋？」我難以置信咁問：「妳應該同佢哋講，然後搵滅蟲專家，或者防疫中心嘅人，一把火燒滅佢……」

「因為佢唔想……」小如回應，可以見到佢震得越嚟越犀利。

「『佢』？邊個佢？」

就喺佢諗住解釋嘅一刻，我注意到側邊嘅衣櫃突然出現異樣──有一隻曱甴喺裡面跑出嚟。鄉村長大嘅我本身係一啲都唔驚昆蟲，但喺呢個氣氛下都難免嚇咗嚇。反應過嚟後，我就好似慣常做法咁一掌拍死佢。

然而拍落去嗰下，我掌心除咗麻痺感就再感覺唔到任何嘢，有一刻仲以為畀佢走甩咗。但就喺我放開手嘅一瞬間，隻曱甴居然喺我掌心迅速咁竄出嚟……

「嘩！？我頂！」我反射性咁用力揮手，雖然成功甩走手上面嗰隻曱甴，但可怕嘅事仲未完結。

第二隻、第三隻、第四隻、第五隻……我掌心開始冒出現更多曱甴，源源不絕，就算點甩都甩唔晒，唔使幾秒已經多到足以掩蓋我半隻手臂。

「啊……啊啊啊啊！！」呢刻，我只能夠無助咁大聲嗌，同時開始四圍咁撞，最後成個人失平衡跌落地。

「阿偉！快啲離開間房呀！」

聽到小如咁講之後，我即刻狼狽咁向門口方向爬。果然，爬出睡房後，事情終於出現變化。本來就快要爬到我條頸嘅曱甴群居然喺一瞬間化成灰燼，然後一直飄……飄返入房，最後落到嗰舊「異物」度。就好似吸引到大量養份一樣，「異物」滿足咁發出鮮紅色嘅光，隨即又開始脹大。

「係佢……」下一刻，小如繼續頭先未完嘅話：「係嗰隻『怪物』威脅我唔可以講畀屋企人知。如果唔係，就會用呢種方式對付佢哋……甚至，殺死佢哋。」

呢刻，驚魂未定嘅我當然唔識得回應。可以嘅話真係想直接跑出走廊，離「異物」越遠越好。但唔知係因為太驚定受到啲曱甴影響，所以雙腳軟到冇辦法企起身，只可以勉強向後爬……

終於，確認自己暫時安全之後，我先用沙啞嘅聲線問：「咁點解……妳又可以話畀我知？」

問完嗰刻，我突然有個好壞嘅念頭。頭先小如先提過隻「怪物」威脅會殺死佢屋企人……唔通，佢今晚叫我過嚟，就係想將我獻畀隻嘢？

唔會嘅，小如絕對唔會咁做……

「係佢叫我搵你，」然而，小如偏偏係咁樣回應：「佢話……佢已經受夠，唔想再留喺度……佢、佢想……」講到呢度佢突然合埋雙眼，一臉痛苦咁繼續講：「而你、你……識得搵人嚟『清潔』咗佢。」

「吓？清潔……？」

「阿偉……你係咪識得人可以幫手？」

最初我腦海真係一片空白，但慢慢我就理解過嚟，然後講：「我的確係有個中學同學開咗間清潔公司，但已經有段時間冇聯絡過佢……」

「叫佢嚟……只有佢……先可以解決到呢一切。」

（待續）

專欄作者簡介：
有心無默
網絡作家，以創作為樂。真實身份為故事星人。著有《西營盤》、《絕命上映》、《絕望走廊》等暢銷小說。

Facebook專頁：
https://www.facebook.com/Echo.of.Heart

發掘更多身邊的小城故事，請LIKE 蘋地Facebook Page，並設定為「搶先看」： https://www.facebook.com/appledailyland