李佳芯（Ali）、林師傑今日去到鑽石山荷里活，以足球大使身份出席「俄羅斯足球狂熱」活動啟動禮暨表演賽。

Ali話佢一向有留意世界盃同足球賽事，今年都會追看：「我未入行嘅時候睇嘅係碧咸、C朗、美斯，好多已經退休。」係咪靚仔球星先至鍾意？Ali笑言：「你覺得我鍾意靚仔咩？」咁睇番佢男友陳炳銓，又真係好有說服力。

Ali話睇球星會取得平衡，外貌與球技並重，又話唔會同男友因為睇波而爭嗌：「太多嘢可以鬧，唔會因為睇波嗌交。」佢反而鍾意同朋友一齊食飯睇波牙骹戰。

林師傑自認為對球賽興趣不大，不過佢18歲喺新加坡入籍當兵嗰陣，世界盃就俾到佢好大娛樂，林師傑憶述：「受訓生活乏味，當年可以用收音機聽到世界盃比賽已經好開心，記得當年係意大利捧盃。今屆世盃係最後單身嘅一次，雖然自己唔睇波，但係都會約單身派對睇波。」

精選娛聞，喺晒《娛果》
http://fb.com/appledailyent