昔日嘅金童玉女，畢彼特（Brad Pitt）同安琪蓮娜祖莉（Angelina Jolie）去年9月申請離婚，二人由本來勢成水火，到而家可以和平共處，關係改善咗許多。有見及此，佢哋嘅6個仔好希望二人有機會復合，不過，畢彼特就好肯定咁話，佢哋唔會復合。

美國《OK!》雜誌指出，畢彼特為自己嘅酗酒問題感到後悔，而家佢已經重拾正軌，亦都戒咗酒癮，仲同仔女一齊接受心理諮商，身心狀況都好咗很多。對佢嚟講，6個子女就係佢嘅全世界，佢唔希望對小朋友講大話，亦唔想俾假希望，所以好堅定咁講佢唔會同安琪蓮娜復合。

畢彼特失婚呢9個月，坦然面對佢嘅過錯，特別係導致佢生活脫軌嘅酒癮，但呢件事都令佢同小朋友更親近，友人指出：「佢同小朋友講，分開嘅每分每秒都掛住佢哋。」畢彼特2月獲得法官許可，可以探6個仔女，期間佢帶班小朋友去動物園、夜晚會喺屋企睇戲，仲會為佢哋下廚。雖然二人嘅離婚協議仲未拍板，但佢哋已經決定要朝共同撫養嘅方向前進。