當年今日
關於我們

股路縱橫:落後股發力地鐵目標28元 - 郭兆誠

蘋果日報 2007/10/04 00:00


港股連升4000點後(中間只輕微調整1日),終於出現較大幅度的回吐,噚日恒指最高28871,升過670點,但跟住掉頭急挫,最低潮之時曾大跌950多點,尾市略有反彈,埋單計數,全日大跌719點,期指更大跌960點,大低水224點。
噚日成交好犀利,超過2000億元,大升後又大跌收場,成個單日轉向格局,係第一次「狼來了」,但由於大市升勢係由北水主導,屬於資金市,估計調整的時間唔會長,幅度唔會大,回一回氣後,仍有再升之力。
噚日上升正股有成200多隻,大落後股滙控(005)卒之發力,衝上150元大關後回收147.70元,大升3.70元,成交更大增到超過1億股,今次衝破145元的長期阻力位,上升目標指向155元,可到價才沽貨獲利。
港交所(388)最高逼近250元大關,但升得急,回得快,低收234.80元,跌番11.80元,正常調整,唔排除回一回之後,港府又會再買過。另一隻有同樣憧憬嘅地鐵(066),噚日就逆流而上,高見25元後回收24.05元,仍上升0.45元,成交再大增到4350多萬股,明顯係有大盤吸納。地鐵在23元水平橫行咗大半個月,近兩日破位而上,照度上去,目標指向28元。
地鐵亦係大落後股,今年1月底,股價已見22元,當時恒指20600點,現時恒指已上升34%,地鐵股價升幅都唔夠10%。大落後股一發力,升勢可以好勁。
地鐵在內地已參與發展深圳項目,另有多個城市嘅大計劃洽商中,在內地好有知名度,亦會係北水吸納對象之一。現時內地同類股的PE平均約40倍,地鐵07年預測每股盈利1.20元,PE只係20倍,確實好吸引。

買3747博升6成

兩鐵合併,由於過去一年物業市道持續向好,地鐵擬收購的九鐵物業,已升值28億元,若計入此數,地鐵的PE將更低。另外,合併後所採用的可加可減票價機制,長遠計加幅較大,對地鐵更有利。看好地鐵,可吼地鐵C輪3747,地鐵升2元,3747可見0.40元,升幅逾60%。