【23:15】新增煤氣公司回應。

鰂魚涌英皇道993號得利大廈，自本月11日開始，因大廈天井出現煤氣洩漏，需換喉維修，惟其中一樓層的業主與租客聯絡有延誤，未能及時維修，導致全幢22層同一房號（26室）的住戶被截煤氣，至今日事隔9日仍沒有煤氣供應。有住戶投訴造成極大不便，「想煮飯都冇辦法，一係食飯盒，一係食杯麵」，形容心情難受，又批評煤氣公司沒有通知用戶何時解決問題，不理顧客戶感受。

得利大廈住戶黃先生對《蘋果》表示，自4月11日下午4時20分，大廈貼出通告指要暫停煤氣供應，以便進行煤氣維修工程，事隔9日，至今時今日仍未維修妥當。黃先生說：「低層26室煤氣喉出問題，疑有人唔肯畀錢維修，所以cut咗成幢大廈所有26室嘅煤氣供應，9日以來仍未搞掂！我沖涼用電爐，但用煤氣煮食，依家我同老婆、女兒三個人都係食飯盒，一係食杯麵，但大廈管理處冇交代過，一問三不知，毫無答覆。我心情好唔舒服，一個業主唔肯維修，影響咁多個26室嘅住戶，我係煤氣公司用戶，冇煤氣用，煤氣公司唔考慮我哋感受，不了了之，冇通知一聲，冇出信通知我哋原因或解決方法，管理處亦冇解釋！」

管理處職員接受《蘋果》查詢時指出，本月11日天井發現洩漏煤氣，召來煤氣公司檢查，發現有數個單位的煤氣喉有漏氣迹象，須換喉維修。管理處解釋，大廈的氣喉由管理處管理，相信是由大喉入單位的細氣喉出現漏氣，有關公司已通知受影響單位須進行緊急維修，其中涉事的25室已維修好，惟低層26室一個單位一直未有維修，因為業主與租客聯絡方面出現延誤，不排除有人嫌煤氣公司收費貴，要另外找多幾間外判公司「格價」，所以「搞咗咁耐」。

管理處職員說：「搵到公司仲要師傅搭棚才能做，又要約時間，啱啱星期六師傅嚟咗影相、報咗價，搭棚之後，一個下午都可以整好！」職員解釋並非業主或租客故意拖延，只是聯絡上花多了時間。

煤氣公司指，由於有關煤氣立管裝置屬於業主擁有，煤氣公司需得到業主或大廈業主立案法團確認後，才可進行煤氣喉管維修工作。基於安全考慮，煤氣公司須暫停整座大廈26室的煤氣供應，以保障公眾安全。煤氣公司已嘗試以不同渠道聯絡業主和大廈業主立案法團，當收到其確認後，便會盡快跟進。

-----------------------------
App內1-Click訂閱《蘋果動新聞》
按此了解更多
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568