【李八方online】娥特被禁足官員照到賀 民主黨黨慶籌$420萬
石禮謙劉鳴煒李八方ONLINE鄭若驊方剛邵家輝陳國基劉國勳容海恩田北俊陳茂波民主黨林鄭月娥周梁淑怡張建宗林大輝
民主黨今日舉行24周年黨慶,雖然今年無請娥特同律政司司長鄭若驊,仲喺黨慶活動小冊子上批評特首只顧面向內地、配合內地,徹底忘記香港成功係有賴本港嘅核心價值,但多名特區政府官員繼續畀面出席酒會,包括政務司司長張建宗、財政司司長陳茂波,以及多名局長同特首辦主任陳國基。
問到陳國基今日有咩訊息代娥特帶來時,陳國基就話:「林太鼓勵我哋(官員)出席!」但就話無同娥特討論係咪要捐錢。陳國基又話,娥特只鼓勵官員多啲出席不同政黨黨慶,要做到「一視同仁」。問到娥特係咪同上任特首689做法不同(689過去不獲邀時,即下令官員不准出席民主黨黨慶)時,陳國基笑言:「林太無呢個規矩。」
咁不獲邀請的娥特,幾時開始鼓勵官員出席民主黨黨慶呢?陳國基話娥特一早已講,「我哋話收到邀請啊!佢(林鄭)就話多啲出席囉!」佢話唔覺娥特有因為自己不獲邀請而唔開心,因為不同人都有不同考慮,相信娥特晚晚都有好多節目喎。
民主黨主席胡志偉致辭時話,政黨為咗巿民福祉,需要同政府保持正常工作關係,但未來會繼續表達該黨唔認同政府施政嘅地方。
其他現身黨慶嘅嘉賓,包括噚日接受卿姐訪問時,聲稱不便評論《逃犯條例》嘅劉鳴煒,佢今日同卿姐重遇時笑言:「我無甩底,無嚇走,係咪先?」至於「薯片叔」曾俊華今日就同肥仔聰同場現身,其間運房局局長陳帆主動上前吹水,管開錢嘅曾俊華被問到點睇「明日大嶼」工程造價估算要成6,240億時只話:「我無嘢想講。」
建制派方面,要數自由黨最畀面,田北俊、方剛同周梁淑怡都坐低食飯,前議員林大輝亦有現身。多名現任建制派議員包括民建聯劉國勳、經民聯石禮謙、新民黨容海恩、自由黨邵家輝等則有現身酒會。田北俊、周梁淑怡和方剛,喺晚宴尾聲同民主黨成員喺台上合唱「朋友」一曲。
民主黨籌款委員會主席袁海文最後宣佈,今晚籌款數字超出預期,共籌得420萬元。上年佢哋黨慶籌得大約500萬元,今年無邀請林鄭出席,籌款數字跌了大約80萬。
-------------------------
《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw
-------------------------
全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef
「薯片叔」曾俊華今日就同肥仔聰同場現身,其間運房局局長陳帆主動上前吹水。林俊謙攝