今朝完咗威尼斯影展，多倫多電影節繼續好熱鬧，正所謂貴人出門招風雨，兩位金像影后駕到，當地即大風大雨。金像影后妮歌潔曼（Nicole Kidman）穿上貼身長裙宣傳新片《Lion》，一向優雅嘅佢一落車就被強風吹到頭髮亂晒，有少少狼狽嘅佢見當地粉絲咁熱情，都唔理亂髮飛飛行去同影迷合照，而且仲笑容滿臉，相當親民。佢入到室內就攬緊拍檔朗妮瑪娜（Rooney Mara)合照。

至於剛失威尼斯影后嘅金像影后妮坦莉寶雯（Natalie Portman），話咁快就同尊尼狄普（Johnny Depp）愛女Lily-Rose去到多倫多宣傳《Planetarium》，由於落緊大雨，工作人員就為妮坦莉擔遮，仲要將把遮盡量提高，佢個表情有啲辛苦！