李克勤、周國賢(Endy)、AGA今晚喺土瓜灣為拉濶音樂會綵排，克勤彈住結他同Endy、AGA一齊合唱《夏日之神話》，Endy話到時會拉奏大提琴，AGA就話：「今次個騷大家用好多樂器，會互唱大家嘅歌，我會為自己新歌跳舞。」克勤聽到之後，個樣好驚訝：「吓！你點解咁㗎！丟低我哋，不過都好嘅。」Endy笑話：「你咁樣搞到我都想返去練多幾個step，唔知點解，我每次跳舞，大家都睇到好開心。」聽到Endy話要返去練舞，克勤即刻封定後門：「你唔使預我啦！我唔會跳，我幾年至會練一隻舞。」佢仲笑話自己只限「左麟右李」開騷時至會跳舞。

另外，Endy老婆被指肚凸凸似有喜，問佢係咪準備做第4任爸爸？Endy即刻耍手擰頭話：「唔好啦！」係咪想追個仔？佢再一個驚訝樣話：「唔係吓話，應該就唔係。」佢強調太太冇B，亦都排除順其自然：「只係幻覺嚟嘅啫！」

Endy有3個女，問佢會唔會問克勤生仔經？克勤搶住話：「仔嘅嘢，要合指一算。情到濃時就得㗎啦！」問到克勤會唔會向Endy問生女秘坊？克勤笑話：「你唔係咒我呀！我啱啱至甩身可以去火車旅行。」

企喺兩男中間嘅AGA，聽到二人對話之後，唔知點解個樣有啲尷尬，克勤發現就話：「你哋唔好喺女仔面前問啲咁嘅嘢啦！」不過AGA話只係見到兩個爹哋，覺得佢哋好幸福，克勤呻話：「你睇我好，我睇你好，家家有本難念的經，我辛苦你唔知啫！不過早生有早生嘅好，遲生未遲啲開始囉！呢樣大家都控制唔到。」Endy隨即拍拍AGA，苦口婆心話：「你都係玩耐啲啦！遲啲先諗。」

精選娛聞，喺晒《娛果》
http://fb.com/appledailyent