香港政府唔想市民變病態賭徒，就以「沉迷賭博等於扔錢落海」嚟做廣告宣傳口號，估唔到喺美國有租樓住嘅人都被朋友話「租樓等於扔錢出街」﹗
網友Paris40喺《MSN》討論區度呻，今年27歲嘅佢一直都喺紐約租樓住，雖然已有一筆儲蓄可以隨時用嚟買樓做首期，但佢從來無諗過置業，點知有好多已經做咗業主嘅死黨，都叫佢唔好再繼續嘥錢租樓，仲話租樓等於扔錢出街，搞到佢心大心細，要向網友討教。
Herring聞言反問：「有冇人會覺得買嘢食同搭車等於扔錢出街先？」佢認為置業人士已有既定立場，當然贊成買樓好過租，因為佢哋可能會覺得租單位住即係等於幫業主供樓，同將啲錢扔出街冇乜分別，所以覺得唔值，佢認為屋租其實只不過係享用「住宅服務」的代價，同你交水費、電費無異。sgtm7亦好贊同呢個講法，佢話：「唔通屋企有花園可以種植，就話啲人去街市買菜等於扔錢落海咩？」

年中慳番唔少維修費

業主loomatic就認為租樓同買樓嘅最大分別，就係間屋有乜事如漏水、更換喉管等，租客都可以搵屋主搞掂，年中可以慳番唔少家居維修同保養費用；但做業主嘅就要事事親力親為，花錢花時間打點家居嘅一切。
sneakers雖然係有樓之人，但都贊同租樓其實可以慳到錢，仲可以用嚟投資喺一啲高回報嘅投資工具，但唔係人人都識投資同持之以恒，所以佢認為供樓始終係一項唔錯嘅強制性儲蓄計劃。