【本報訊】身為執業大律師的民建聯馬恩國，年初在立法會會議上爆粗，辱罵政見迥異的社民連梁國雄，社民連黃浩銘早前向大律師公會投訴，昨日收到公會回覆，指已就事件作出詳細調查，決定將其操守呈交大律師紀律審裁組進行紀律研訊。
曾任審裁組召集人十多年的資深大律師湯家驊表示，審裁組由一位資深大律師、一位普通大律師，及一位業界以外公眾人士組成，聆訊委員會展開聆訊。大律師公會將聘請一律師行，轉聘一名大律師作檢控方，提出檢控的罪行相信為「Conduct unbecoming，即係喺公眾場所作出不恰當行為，令行業蒙羞」。

若成立料僅譴責不停牌

湯家驊說，裁決會交由大律師公會執委考慮如何處置，有時會公開譴責，有時會私下譴責，嚴重者可被停牌甚至除牌，「但係以馬大狀表現，應該唔會去到停牌、除牌呢個階段，未到咁嚴重，罪成可能都係作出譴責」。
不過，在議事堂爆粗鬧得滿城風雨，湯認為事件早已令業界蒙羞，「一般人對大狀期望都係比較講道理，比較唔會喺公眾場所用一啲粗言污語，去侮辱意見唔同嘅人，唔係可以簡單接受嘅行為」。