地產多聲道:惜貨如金傲雲峰拖長嚟賣

蘋果日報 2004/09/18 00:00


市況好轉,一手貨尾不再長賣長有,長實土瓜灣傲雲峰,全部二千幾個單位,到𠵱家入伙前夕,只係賣剩九十個。長實營業經理梁焯熞話,要減慢去貨速度。
於是每個周末限量賣四個,賣晒都唔會加推,入唔切貨嘅買家,就要等到下個周末先至有得買。
咁嘅進度,預計到年底入伙時都賣唔晒。傲雲峰喺紅磡都會商場嘅示範單位長期開放,雖然自己場,唔使交租,不過,燈油火蠟同人手都唔少錢,一個禮拜限賣四間,都咪話唔浪費人力物力。
蘭西建議,既然咁好賣,不如快快趣趣賣晒佢,好過浪費資源。

太古廣場開名表廊
金鐘太古廣場三樓藝廊街舊址,已經變身成為專賣名牌鐘表珠寶嘅WatchandJewelleryGallery,著名伯爵表,就在此開設全港首間專門店。
太古噚日請嚟幾位模特兒(圖二),示範多款最新名牌珠寶手表,以收旺場之效。
田國輝遭渣打追數
已清盤嘅鴻運地產,創辦人田國強,繼俾地鐵申請破產後,再因涉嫌與屯門茵翠豪庭住宅發展計劃嘅二千萬按揭貸款詐騙案有關,而被檢控。佢細佬田國輝,近日則俾渣打銀行入稟法院追數。
田國輝九七年七月十一日,將沙田銀禧花園八座三十四H室,向渣打銀行承造樓按,最近渣打入稟法院,向佢追討該單位嘅按揭貸款及有關費用。
田氏兄弟喺鴻運地產結業後,先後涉及官司,認真令人欷歔。
資料顯示,田國輝喺鴻運清盤後,加入咗利嘉閣。

港商揚州建珠寶城
港商近年大舉北上,地產係投資重點之一,而且唔再局限於幾個大城市,好似香港羅蘭斯寶集團,就喺揚州投資「中國˙揚州國際珠寶城」,一個集合珠寶加工、經營、展示、拍賣,重有購物、飲食、商廈同酒店等好多功能同設施喺一身嘅綜合項目。
佔地六百幾畝,樓面逾六百萬呎,投資十億。當中珠寶大廈同商場,明年四月入伙,其他明年底陸續落成。
揚州市政府日前喺深圳舉行推介會,請咗好多本港商界人士出席。
世紀21吳啟民話,項目由佢哋負責銷售。

今年賣樓多數有賺
二手私人住宅,轉手有賺比例回升,本月上旬,一千零六十四宗有買入價嘅登記,逾半轉手獲利,比上個月全月略多。舊年同期,比例只得一成六。
近半年二手獲利比例都係五成或以上,中記黃良昇認為,數據反映樓市前景樂觀,買家信心增強。佢估計,隨住樓價持續上升,多咗業主賣樓賺錢,唔少會轉買較大單位,改善居住環境。
中記分析呢批個案,發現賺幅細過一成嘅比例最高,佔近三十三巴仙,一到兩成嘅有二十七巴仙,賺到五成以上,就得四點八巴仙。
蘭西
電郵地址:[email protected]
empty
(圖二)
empty
吳啟民(左)話,世紀21係「中國.揚州國際珠寶城」銷售代理。