港台節目《視點31》本月初喺facebook專頁使用「習帝永續？」字眼後，引起建制媒體《HKG報》攻擊，港台喺《HKG報》投訴事件嘅同日迅速跪低，下令刪去有關字眼。據了解，將於8月初約滿嘅港台台長梁家榮今午曾召開內部會議，同近50名員工交流，席間討論過上述事件，有與會者話梁家榮似乎想為事件「降溫」，冇要求追究個別同事，並形容港台平均每日都收到數百宗投訴，《HKG報》嘅投訴只係其中一宗，強調港台只係按一般正常機制處理。

據知有員工問到梁家榮係咪有意續約？梁家榮冇作正面回應，只稱「會好好做埋呢幾個月」，希望為港台建立良好根基。

至於早前有傳商經局不滿梁家榮未能平息事件，甚至有指常秘利敏貞曾大發雷霆，明言如梁不能善後，續約「凍過水」。據知梁家榮席間亦就此講到，自己係喺同利敏貞會面同《HKG報》投訴前已經睇過《視點31》有關「習帝永續？」嘅面書帖文，並決定要求港台各部組暫時停止所有fb帖文，只係咁啱喺同利敏貞開會後先公布啫。

據知梁家榮曾主張要由港台高級職員審查後，港台節目先可以發佈面書帖文，但員工反映由相關節目監製批准已經足夠，梁家榮亦接受員工意見，但重申自已係「老一派人，要穩陣啲」，強調員工日後「要小心啲起題」，又認為當日「習制永續？」四字有問題，指如果當日是由他負責起題，如果係佢，或會改成「是否習帝永續？」，有員工則反映當日嘅內容只係想提出問題，冇贊成或反對立場，只係想吸引巿民討論。

八方都問過港台，梁家榮係咪有好多心得同員工分享？港台發言人回覆指，呢次會議唔係因應早前面書事件而召開，指席間雖然有討論早前嘅面書事件，但梁家榮只係就港台節目，同員工進行一般恆常交流。