岑日珈(Angie)新歌《從一而終》，佢話自己一年冇出歌，心情好緊張。今次首歌係講一個幸福嘅故事，一對情侶唔介意對方嘅缺點、轉變，最後白頭到老。佢又話自己都好恨搵到呢種關係，自言未有對象。

不過Angie現身，傳媒嘅焦點緊係唔係佢首歌啦，鄭俊弘嘅緋聞先係戲肉！

入直路之前熱個身先，記者就問Angie擇偶條件，佢好天真咁話：「專一好重要，永遠對我一個人好，唔可以有第二個。」如果有第三者點算？爭過先？佢就諗咗諗然後話：「要睇個女仔係咩人嚟先……唔爭喇都係。」咁Angie試過未先？佢好有自信咁話：「未遇過，我唔會遇到啲咁唔好嘅男人，我只會遇到啲好嘅男仔。」

好！戲肉嚟喇！

咁Angie覺得鄭俊弘(Fred)好定唔好呀？你哋曾經一齊放狗，你又讚佢好仔㗎喎！Angie一聽到就好大反應：「有咩！」

有，喺呢度：　
【帶頭杯葛】同鄭俊弘放狗傳緋聞 岑日珈俾何雁詩踢出群組　（ http://bit.ly/2oAM708 　）

當Angie意識到係講緊Fred背未婚妻暗撻何雁詩一事，佢開始之吾以對：「如果個報道係真嘅話，咁佢就唔好喇我覺得。如果佢有女朋友，有未婚妻又同第二個一齊，我覺得咁樣好唔啱。因為你……仲要嗰個係同事喎，同同事搞上關係……我覺得，第一，對公司個形象唔好；第二對自己個正印真係唔好，如果真係有未婚妻嘅話。我如果選擇男朋友，我一定唔會選擇咁囉。」轉個頭仲好天真咁反問記者：「件事係真㗎咩？係真定假㗎？」

事件孰真孰假Angie可以問番Fred本人啦，佢哋咁熟，點Angie話：「我唔係好熟㗎咋喎，(嘩！一齊放狗喎你哋？)我哋喺group chat嗰到聯絡咋，當時問大家放唔放狗，得佢(Fred)話放。(你依家再約佢放狗咪得囉？)我俾人踩咗出群組喇！」

未完㗎！岑日珈仲爆「放狗事件」之後有人好保護鄭俊弘，仲出晒面o添！記得睇埋下一篇報道！