亞視舉行嘅《2009年亞洲小姐競選》20位嚟自港澳特區賽區、台灣地區賽區及中國內地賽區嘅佳麗，噚日喺荃灣出席記者會見傳媒，班佳麗着住豹紋deepV短裙喺台上行catwalk，來自中國內地賽區嘅9號李雪婷、10號王晨及比堅尼皇后18號劉伊心上圍相當出眾。
被傳隆胸整容嘅2號「A貨李嘉欣」王希瑤上圍突然逼爆，有記者就話佢今日嘅身材真係好勁，王希瑤話：「我用咗nudebra嘛！我唔知其他人有冇用到，但係我唔會次次都用，會睇情況而決定。」問佢有冇擔心俾人話係「變幻球」？王希瑤就話：「係真嘅先至可以變大變細，假嘅就好難改變，所以我真係冇隆胸。」

講到劉伊心之前話佢因戴咗nudebra而變幻莫測時，王希瑤話：「係咩？我冇睇報道喎！我哋都有傾偈，如果我喺台灣都會去參加比堅尼皇后選舉，可能有機會贏o架！」王希瑤俾人追問有冇覺得蝕咗？佢話：「我唔覺得蝕底，我都唔心急，可以慢慢嚟。」
聲稱識講唔識聽廣東話嘅比堅尼皇后劉伊心，佢喺台上用唔鹹唔淡嘅廣東話自我介紹，結果鬧出唔少笑話，好似「劉伊心」變成「劉醫生」，不過佢做訪問時都堅持講廣東話，認真勇氣可嘉。
雖然劉伊心曾經有選美經驗，不過佢話今次選亞姐都有少少緊張，講到佢有冇用nudebra時，佢話：「我冇用呀，我係真材實料，我唔知其他人有冇用，但係我覺得個個女仔身材都好好。」至於有冇覺得王希瑤出術？劉伊心就話唔知道。