去年黃大仙翠竹花園爆炸案事隔不足半年，其中一名死者的丈夫、五十五歲的廖忠仁因思念亡妻，終日鬱鬱寡歡，在清明節以利刀自殺死亡，與妻子共赴黃泉。廖家姊弟再次面對慈親去世的打擊，精神接近崩潰，還要為亡父的殮葬費而奔波，蘋果基金即時撥款解其困境。

「爸爸嘅性格好內向，咁多年嚟媽咪都係家庭嘅支柱，所以媽咪過身對爸爸造成好大創傷，要睇精神科醫生同埋食藥，佢失去咗枕邊人，除咗唔識得照顧自己之外，又冇咗個傾訴對象，成日垂頭喪氣，行為又好恍惚。」面對突如其來的噩耗，二十六歲的長子阿銘不諱言對其人生觀造成莫大衝擊，容顏憔悴的他激動地說：「我要盡量控制自己嘅情緒，諗辦法籌錢快啲搞好阿爸嘅身後事；坦白講，半年內失去咗阿爸同阿媽，屋企做咗兩次白事，我都唔知對將來生存嘅意義有乜影響。」

意外爆炸母亡
任職水務署一級工人的廖父，與從事紗廠工人的妻子結婚三十年，育有四名兒女，夫妻經常形影不離，是子女眼中的模範父母。數年前，長女阿兒婚後移居外國，十六歲的幼子亦前往外國升學，並由阿兒負責學費，擔子不輕。長子阿銘與次子阿成均從事冷氣維修技工，惟每月收入不穩，家庭的開支便由雙親共同分擔。
從外地來港奔喪的二十八歲長女阿兒愁眉不展地說：「爸爸係一個好嚴肅嘅人，好多嘢都係心知唔會講出口，鄉下重男輕女，但喺我細個嘅時候，佢一樣咁錫我，成日帶我周圍去玩；𠵱家我結咗婚，有次我同囝囝返嚟，佢除咗一早煲粥畀孫仔食之外，重好細心咁幫佢沖涼。」
去年十月三十日，翠竹花園發生石油氣大爆炸案，五十五歲的廖施翠娥無辜枉死，廖家無力支付殮葬費用，蘋果基金從「殮葬專戶」撥款以解廖家燃眉之急；早前他們另接獲讀者捐款三千二百元。